KCR logo
KCR logo
ewedw

తెలుగు తేజం పీ.వీ

సీ ॥ శ్రీవాణి తనలోన స్థిరముగా కొలువయి
గర్భంబు నందునే గడిపె నేమొ !
ఆ బృహస్పతి తానె యావహించిన క్షణ
మందునే జననంబు నందె నేమొ !
శ్రీకృష్ణ పరమాత్మ జీవమై నిలుచుండ
పురిటినొప్పుల తోడఁ బుట్టె నేమొ !
బ్రహ్మయే తనచేతి వ్రాతలన్‌ మార్చగా
మారు రూపంబునన్‌ బంపె నేమొ !

తే॥గీ॥ వాక్కు , బుద్ధియు, చతురత, భవిత దిద్దు
నేర్పు లొక్కటై వచ్చిన నేత యౌట
నిజము నిజమిది నరసింహుఁడీ జగాన
మహిత కారణ జన్ముండు మరువలేము !

సీ ॥ ఉద్యమాలొక ప్రక్క విద్యయు నొకప్రక్క

ఏక కాలమునందు స్వీకరించి
రెంటికిన్‌ న్యాయంబు నొంటిగా జేసిన
ఘనుఁడు కదా ! పీవి తెనుఁగు ఠీవి !
యువకునిలో రేగెడుడుకు రక్తము దనన్‌
స్వాతంత్య్ర పోరాట సమర మునకు
పరుగులు వెట్టించ పదములు గలిపెను
వ్యాసముల్‌ వ్రాసె నుద్యమము పైన

తే॥గీ॥ ఒక్క ప్రక్క నిజాముని నక్క జిత్తు
లొక్క ప్రక్క తెల్లదొరల లెక్కలేని
యట్టి దమనకాండ మనసు నగ్ని రేపె
సింహమయ్యెను మన నరసింహ మపుడు !

సీ॥ బలములేని ప్రభుత్వ పగ్గాలు చేఁబట్టి
ఊపిరిలూదిన యుత్తముండు
అధికార పార్టీకి నండయై నిలచిన
ధీరుఁడీతఁడు మహా దిగ్గజుండు
దిగజారిపోవు నార్థిక పరిస్థితిఁజూచి
గాడిని పెట్టిన వాడితండు
అపరచాణక్యుడై యధికారమును పూర్తి
అయిదేండ్లు నిల్పిన యట్టి ఘనుఁడు
ఆ॥వె॥ క్షీర సాగరంబు చిల్కగ నానాడు
తొట్ట దొలుత విషము బుట్టినట్లు
పీఠ మెక్కిన వెనువెంట వైషమ్యముల్‌
బుట్టె నయిన ఁదాని నెట్టినాడు

డా॥ వూసల రజనీగంగాధర్‌
పీవీ స్మారక లెజండరీ పురస్కార గ్రహీత
9290680605